ភ្នំពេញ៖​ នាយករដ្ឋមន្ត្រីនៃប្រទេសកម្ពុជា សម្ដេចតេជោ ហ៊ុន សែន បានជំរុញដល់មន្ត្រីពាក់ព័ន្ធឲ្យស្វែងរកមធ្យោបាយដើម្បីការបើកស្ថានទូតកម្ពុជានៅប្រទេសហុងគ្រីឡើងវិញថាដើម្បីជំរុញទំនាក់ទំនងរវាងប្រទេសទាំងពីរ។

ថ្លែងនៅក្នុងពិធីប្រគល់និងទទួលវ៉ាក់សាំងដែលជាជំនួយពីប្រទេសហុងគ្រីចំនួនជាង ៥សែនដូស នៅវិមានសន្តិភាពនាព្រឹកថ្ងៃទី១៨ ខែមីនា ឆ្នាំ២០២២ នេះ សម្ដេចតេជោបានលើកឡើងថា៖ «ខ្ញុំសូមលើកទឹកចិត្តអោយមានការជំរុញនៃការបើកស្ថានទូតនៃប្រទេសទាំងពីរឡើងវិញ។ ដែលជាការបើកប្រវត្តិសាស្ត្រថ្មីមួយសំដៅជំរុញនូវទំនាក់ទំនងការទូតកម្ពុជាហុងគ្រីឲ្យកាន់តែស៊ីជម្រៅនិងពេញលេញថែមទៀត»។

ទំនាក់ទំនងការទូតកម្ពុជា-ហុងគ្រី ត្រូវបានបង្កើតឡើងដំបូងនៅថ្ងៃទី២០ ខែកញ្ញា ឆ្នាំ១៩៥៦។ ទំនាក់ទំនងនេះត្រូវបានកាត់ផ្ដាច់ក្នុងអំឡុងពេលដែលរបបខ្មែរក្រហមគ្រប់គ្រងប្រទេសកម្ពុជាពីឆ្នាំ១៩៧៥-១៩៧៩ ប៉ុន្តែបន្ទាប់មកបានបន្តឡើងវិញបន្ទាប់ពីខ្មែរក្រហមត្រូវបានដួលរលំ។

កាលពីខែវិច្ឆិកា ឆ្នាំ២០២០ ក្នុងដំណើរទស្សនកិច្ចរបស់រដ្ឋមន្ត្រីការបរទេសហុងគ្រីលោក Péter Szijjártó បានបង្ហាញនូវបំណងចង់បើកស្ថានទូតហុងគ្រីនៅក្នុងប្រទេសកម្ពុជាឡើងវិញបន្ទាប់ពីផ្អាកដំណើរការអស់ ២៥ឆ្នាំ។ ការលើកឡើងពីបំណងនេះត្រូវបានស្វាគមន៍ដោយរដ្ឋមន្ត្រីការបរទេសកម្ពុជា លោកឧបនាយករដ្ឋមន្ត្រី ប្រាក់ សុខុន៕ 

^{PHOTO: EAC NEWS}